سبحان من يرزق بتوع الملاييـن
....................الرازق اللي ما يخيب الرجـا بـه
لي عم عنده معـرضٍ للصواليـن
....................أموت واعرف بس من وين جابـه
وإذا سألته قـال بعـت الدكاكيـن
....................ما يدري إني ما هضمت الإجابـه
الشاهد إني رحت له قبـل يوميـن
.....................في قصره العامـر ودقيـت بابـه
قال أرحب أرحب عدّ ورد البساتين
....................يا مرحبا باللـي لفـا يـا هلابـه
قلت البقا عـدّ النفـل والرياحيـن
....................يا شيخ شمل أهل الكرم والذرابـه
قال أسلم الله يحفظك لي من العين
....................وآمر أوامر حضرتـك مستجابـه
قلت الصراحة طالبٍ قرب غاليـن
....................ودي تزوجنـي كريمتـك يـأبـه
ثنّى وقال أهليـن والله وسهليـن
....................والكون ترخص لجل عينك رقابـه
لكن ترا عندي شـروط وقوانيـن
....................قلت أشرط أشرط يا حبيب الغلابـه
قال أولاً مهر العروسـة ثمانيـن
....................غير الرسوم وغير حق العصابـه
والثانية عمك يبي منـك سبعيـن
....................رسم الأبـوّة والنسـب والقرابـه
وام العروسة حقها منـك ستيـن
....................عشانها ست الحسـن والمهابـه
وأخوانها كلن يبي منـك خمسيـن
....................عداً ونقـداً تنـدرج فـي حسابـه
وخواتها الخمس أعطهن من ثلاثين
....................عشان تتوثـق عـروق النسابـه
وتجيب طقم عيار واحد وعشريـن
.....................وخاتم من ألماس المصفى ترابـه
وأكياس متروسة كعوب وفساتيـن
....................ألوانهـا واشكالهـا مـا تشابـه
وموتر بسواقـه وفيـلا بدوريـن
....................أثاثهـا مـن بطرتـه ينحكـابـه
وأحجز لنا قاعة بقصر السلاطيـن
.....................وأحجز بهـا رقاصتيـن وربابـه
وامنع دخول اهل اللحى والبزارين
.....................وأعزم أميـر المنطقـة بالنيابـه
هذي الشروط اللي على بالي الحين
.....................وذكرني اللي ما حسبنـا حسابـه
قلت اذكر الله يا عـدو المساكيـن
.......................وأستغفـره لا يبتلـيـك بعـذابـه
الظاهر إنك منت عارف أنا ميـن
........................أنا لو ارقا فـوق متـن السحابـه
ما جبت حتى نص درزن مواعيـن
.........................واضحك بكيفك واعتبرهـا دعابـه
شروطكم هذي شـروط المجانيـن
........................شروطكم شغـل إبتـزاز ونهابـه
شروطكم تقصم ظهـور البعاريـن
.........................شروطكـم همّـن وغـم وكآبـه
شروطكم والله سيوف وسكاكيـن
.........................تذبح بنات المجتمع مـع شبابـه
وين الرضا والعطف واليسر واللين
.........................اللي ذكرهـا الله بمحكـم كتابـه
وين الصفات اللي أمرنا بها الديـن
........................وين إختفى نهج النبي والصحابـه
يا عم جعل اللي خلقنا من الطيـن
.......................يرد عقلك مـن خطـاه لصوابـه
ويجعل نصيبي عند غيرك قل آمين
.......................ويحسن عزا الصابر ويجزل ثوابه
قال إنت لو فكرت تفكير صاحيـن
.......................ما شفت في مجمل شروطي غرابه
حنا بعصـر العولمـة والمزاييـن
.......................ماهوب عصر الفلسفة والخطابـه
الخميس 27 أغسطس 2009, 11:01 am
